«Талантты ұстаз- талапты шәкірт» фестивалі
№48 жалпы орта білім беретін мектебінде 2025 жылдың 16 мамыр күні оқу жылының аяқталуына байланысты «Талантты ұстаз- талапты шәкірт» фестивалі өтті. Салтанатты жиынды мектеп директоры Б.Ахметбеков құттықтау сөзімен ашты. Өткізілген фестиваль барысында биылғы 2024-2025 оқу жылындағы аудандық жетістікке жеткен 43 оқушы, облыс көлемінде 16 оқушы пәндік олимпиадалар, ғылыми жобалар, түрлі жарыстарда жүлделі орындарға ие болған дарынды білім алушылар марапатталды.
Әртүрлі спорттық жарыстардың жүлдегерлері «Спортшылар шеруін», сондай- ақ мектебіміздің «Жас сақшылары» ортаға патриоттық әнмен сап түзеп шығып, іс-шараның мазмұнын аша түсті.
Білім мен спорт бәйгесінің оза шапқан жүйріктеріне мадақтама және «Әулиеата-кітап оқитын өңір» жобасына орай сыйлыққа көркем-әдеби, құнды кітаптар сыйлыққа берілді.
«Бұлақ көрсең- көзін аш» демекші, талапты шәкіртті саналы тәрбие мен сапалы білім нәрімен сусындатып, биікке ұмтылдырып келе жатқан талантты пән мұғалімдерінің еңбектері де бағаланды. Білім алушылары жоғары нәтиже көрсеткен және кәсіби жетістігі бар 24 мұғалімді салтанатты түрде марапаттау рәсімі ұйымдастырылды. «Жыл үздігі-2025» марапатымен қоса, мектеп директорының алғыс хаты берілді.
Іс-шара барысында өнерлі шәкірттеріміз ән-би, мәнерлеп оқу өнерлерін көрсетті.
Оқу жылын қорытындылау, педагог әлеуетін, дарынды білім алушыларды ынталандыру, шабыттандыру мақсатында ұйымдастырылған фестиваль жоғары деңгейде өтті.